Farg‘ona tumani hokimligida yoshlarning bandligini ta‘minlash, ularni ijtimoiy hayotga faol jalb etish va zamonaviy kasblarga yo‘naltirish maqsadida «Rahbar va yoshlar» uchrashuvi tashkil etildi. Uchrashuvda Farg‘ona viloyati hokimi o‘rinbosari Sherzodjon Polvonov, tuman hokimi o‘rinbosari Ilhomjon Toshpo‘latov, Yoshlar ishlari bo‘limi rahbari, mutasaddi tashkilot vakillari, yoshlar etakchilari hamda faol yoshlar ishtirok etdilar. Yig‘ilish davomida hududdagi ishsiz va ijtimoiy himoyaga muhtoj yoshlarni kasb-hunarga o‘rgatish, ularni doimiy ish bilan ta‘minlash va har tomonlama qo‘llab-quvvatlash bo‘yicha keng ko‘lamli rejalar muhokama qilindi. Shuningdek, yoshlarning shaxsiy qiziqishlari va imkoniyatlarini inobatga olgan holda, ularni zamonaviy kasblarga — IT texnologiyalari, xizmat ko‘rsatish, sanoat va tadbirkorlik sohalariga yo‘naltirish masalalariga alohida e‘tibor qaratildi. Tadbir ochiq muloqot shaklida o‘tdi. Ishtirokchilar o‘z fikr-mulohazalarini bildirib, o‘zlarini qiziqtirgan savollar bilan rahbarlarga murojaat qildilar va bevosita mutasaddi rahbarlardan atroflicha javoblar oldilar.