Farg‘ona tumani, "Xosilot" mahalla fuqarolar yig‘ini hududida meva-sabzavotchilik yo‘nalishida yirik loyiha amalga oshirilmoqda. Tuman hokimi o‘rinbosari – Investisiyalar, sanoat va savdo sho‘basi boshlig‘i Akbarjon Axrorov tomonidan “Marwin Fruit Line” MChJ tomonidan hayotga tatbiq etilayotgan “Malina va smarodina plantasiyasi” loyihasi bilan tanishildi. Loyiha doirasida jami 57 gektar er maydonida eksportbop meva plantasiyasi tashkil etilishi rejalashtirilgan. Ayni vaqtda 9 gektar erga xorijdan keltirilgan malina, 14 gektar maydonga esa smorodina (qoraqat) ko‘chatlari ekib chiqildi. Qolgan maydonlarda esa hozirgi kunda er tayyorlash ishlari olib borilmoqda. Ushbu loyiha nafaqat yangi ish o‘rinlarini yaratish, balki xorijiy bozorlar uchun raqobatbardosh, yuqori daromadli mahsulot etishtirishga xizmat qilishi bilan ahamiyatlidir. Plantasiya to‘liq ishga tushgach, tumanda qishloq xo‘jaligi mahsulotlari etishtirish salohiyati yanada kengayadi, eksport imkoniyatlari ortadi va mahalliy iqtisodiyot rivojiga munosib hissa qo‘shiladi.